"":الحب الآول:""

الحـب الأول
ان الحمد لله.. نحمده و نستعينه و نستهديه و نستغفره..
و نعوذ بالله من شرور أنفسنا و من سيئات أعمالنا..
من يهده الله فلا مضل له..
و من يضلل.. فلن تجد له وليا مرشدا..
مازلنا مع سيرة الحبيب المصطفى “ص”..
و اتكلمنا في اللقاء الماضي عن الرسالة.. و مكانة الرسالة..
و اتكلمنا عن مرحلة ماقبل بعثة النبي"ص"
و لكن فيه حدث مرينا عليه مرور الكرام .. محتاجين اننا نفصله أكتر لارتباطه بموضوع النهاردة..
النهاردة هانتكلم عن .. الحب الأول..
عن المرأة الأولى في الإسلام..
أمنا .. السيدة خديجة بنت خويلد.. رضي الله عنها..

اتكلمنا في اللقاء الماضي و قلنا ازاي ربنا سبحانه و تعالى اختار الزمان و المكان و الإنسان لهذه الرسالة..
و ازاي هيأ النبي “ص” نفسيا و فكريا و اجتماعيا..
و النهاردة هانتكلم.. عن ازاي ربنا سبحانه و تعالى اختار له رفيقة الدرب.. الزوجة الصالحة ..

زي ماقلنا في اللقاء الماضي..
ان النبي"ص" اشتهر بين الناس بالصدق و الأمانة.. و الحكمة و رجاحة العقل..
دي كانت شهرته.. كشاب.. و كرجل بين رجال مكة..
فكان هو الصادق الأمين بين الرجال..
و ياترى مين أنسب زوجة للصادق الأمين؟
الطاهرة..
ده اللقب اللي لقبت بيه السيدة خديجة من بين نساء مكة..
السيدة خديجة.. النبيلة.. الحكيمة.. سيدة قريش و أشرف النساء في قريش.. الطاهرة..
ترى في محمد “ص” نموذج الرجولة الحقيقية.. نموذج العقل.. و الحكمة.. و الشرف..و التعالي عن السفاسف..
اتقدملها كتير من الطامعين فيها و في ثروتها من كبار رجال مكة.. فتعرض عنهم .. كلهم..
و تسعى.. لمحمد “ص”..
ايه ده؟.. بقى ترفض الأغنياء و الأكابر… و تسعى لمحمد “ص”.. الفقير؟
ايوة..
السيدة خديجة .. كانت قمة في الحكمة.. و العقل..
فشافت في محمد “ص” نبل المعدن.. و الأصل..
لأنها جربته في ميدان.. قليل جدا ما حد ينجح فيه..
ميدان التجارة ..
فاكرين لما قلنا المرة اللي فاتت ان الفلوس لما بتدخل بين الناس.. بتبان المعادن على حقيقتها؟..
و ازاي ان النبي"ص" دخل الأسواق و اشتغل فيها و احتك بالناس و بمعاملاتهم المادية.. فدخل طاهر.. و خرج طاهر زي ماهو..لم تلوثه المادة..
السيدة خديجة لمست النقطة دي بشدة لما جربت محمد “ص” في التجارة.. و شافت منه الأمانة.. و مش بس كده..
ممكن الواحد يبقى أمين في التجارة.. بس خايب و ينضحك عليه. و القطة تاكل عشاه زي ما المثل بيقول..
لكنها لمست في النبي “ص” الأمانة.. و كمان المهارة.. و الذكاء..
بقدر ماكان أمين و صادق في معاملاته.. بقدر ماكان ذكي...و ماهر..

و محمد “ص”.. شاب. في عز شبابه.. 25 سنة..و بتُعرَض عليه أرملة أكبر منه بـ 15 سنة..
ايه اللي يخليه يرضى بيها؟..
و مش بس كده..
يرضى بيها.. ومايتجوزش عليها.. و بعد ما يتوفاها الله يفضل متحسر علي فراقها لآخر حياته..
يحس ان كل زوجاته ماعوضوهوش عنها.. ماملوش الفراغ اللي سابته في قلبه..
الشاب منا في عز شبابه.. بيحلم بالمانيكان اللي هايتجوزها..
و يقعد يتخيلها بقى.. عاوزها بيضا و شعرها اصفر و عينيها زرق..وملتزمة محجبة..و حافظة القرآن كله..
انا اعرف واحد والله مأجل جوازه عشان بيدور على واحدة ملتزمة و منقبة و حافظة القرآن.. ايه؟. و مش لاقيها؟.. لأ أصله مشترط انها تكون بيضا..
فيعني ربنا ينوله اللي في باله..
اللي اقصده.. ان أي شاب مننا.. حتى كملتزمين.. غالبا ماعندوش استعداد أبدا لتقديم أي تنازلات على الإطلاق في موضوع شريكة حياته و زوجته ده نهائيا.. و بيعلل ده بانه يقولك مانا لازم اعف نفسي..
أما النبي “ص”..
بعد ده كله.. ممكن يتقال عنه انه شهواني؟.. أوبيبحث عن المتعة أو بينظر للمرأة كمتاع؟
اللي يقول كده بعد كل ده.. يبقى مجرد افتراء هزيل جدا..
محمد “ص” .. كان يبحث عن القلب الحنون..
و في نفس الوقت.. بيبحث عن العقل اللي يقدر يشاركه في رحلته و يفهم ايه اللي شاغل باله..
و احنا قلنا قبل كده ازاي انه كان أكتر حاجة شاغلاه.. هي الدين الحق.. البحث عن إجابة..
كان بيدور على السند.. و السكن.. اللي يسكن اليه و يشاركه افكاره و أحاسيسه.. في عالم.. ظهر الفساد فيه في البر و البحر..
فمين يكون السند.. غير خديجة “ر”..

اللي يقرأ السيرة.. يستشف منها ان السيدة خديجة زي ماتكون حست ان محمد “ص” فيه حاجة..
الشخص ده هايكون له شأن.. ربنا بيعده لحاجة..
فاختارت انها تكون الزوجة.. المؤمنة بزوجها.. فعرضت نفسها على محمد “ص” للزواج..
وتزوجها محمد “ص”..
و تمر الأيام..
محمد “ص” عنده دلوقت 40 سنة..
سن النضج..
و بحثه عن الحقيقة.. بيزيد يوم ورا يوم..
فبدأ يبعد..
ينطلق الى الجبال..
يقضي الأيام و الليالي في غار حراء.. يتأمل..يتفكر.. يقلب وجهه في السماء..
اين الطريق؟
و السيدة خديجة.. المؤمنة بزوجها.. ترضى انها ترعاه من بعيد.. لم تعترض.. ولم تتذمر أبدا..
ما أجمل ان الإنسان يحس ان شريكة حياته عندها نفس القضية و الرسالة ..
يوم مايغيب.. هي الزوجة و الأم و ربة البيت..
و يوم مايرجع.. هي الحب و الود والأنس و السكن..
و هي مؤمنة بيه..
حاسة بيه..